A yayin bukin, an gudanar da gagarumin Majalisin mawaka karkashin jagorancin Malam Basiru Sha'iri, inda suka fara kwararo baitocin tunda yammacin wannan ranar har zuwa lokacin da aka gabatar da babban bako mai jawabi. Su ma sauran 'yan uwa ba a bar su a baya ba wajen ba da gudummawar halarta cikin tsari, tsafta, da kuma shigar kaya irin na kure adaka.

Haka su ma iyayen bukin, wato 'yan uwa matasan sun ba da mamaki wajen irin salon da suka yi amfani da shi na shirya filin taron da kuma irin shigar da suka yi mazansu da matansu, da kuma wani hotun su Sayyid Zakzaky (H) da suka kawata shi suka rataya a wuyansu, wanda ke alamta su ne masu gudanar da wannan bukin.

Kazalika bukin ya samu halartar Malamai daga ciki da wajen Harka, yayin da matasan suka zabi Wakilin 'yan uwa na Maiduguri Malam Bala (Yahaya) Sa'idu da ya gabatar da jawabi a wajen. Inda ya gabatar da gamsasshen jawabi a kan tarihin rayuwar Imam Ali (AS), ilminsa, jarumtarsa, hakurinsa, da ma kuma irin darajojin da Allah ya yi masa a birbishin dukkan halittu.

An dai tashi daga wannan buki da misalin karfe tara na dare, inda kowa ya tafi yana jinjina ga irin wannan namijin kokari da matasan suka yi.